Meglio 'e niente....

Castellammare di Stabia - Cassa armonica

Meglio ‘e niente

Meglio ‘e niente

manco ‘o bene tuio

c’astregne ‘e riente

pe nun me dà nu muorzeco,

pe nun me dà nu vaso.

Si nun te costa niente

mannarme chi sa addò

pecchè me faie na faccia

brutta comme a morta

e fore ‘a porta me lasce

p’apettà ca te passa.

Io stesso arrasa

e arrassusia

stesso ‘ngrazia ‘e Ddio,

ma vide che ddio ‘e guaio

c’aggia fatto

a metterme cu te

ca si na jatta

ca quanno vuò te strusce

e quanno ‘un vuò ma’mmusce

e io te tirasse nu papauscio

dicenne: - Fristallà. Vattenne

ca chi pretenne

adda pure dà

almeno n’ombra ‘e gioia.

‘E vota tuorne

cu n’aria ch’è speruta

a dirla bbona,

cu ll’uocchie afflessionate

‘e na guaglione

troppa ‘nnammurata.

E io c’avesse fa ?

Allargà ‘e braccie

e tenerte stretta ?

Dicenne pure

quanto si beneretta ?

‘E vvote meglio ‘e niente

resta na fregatura

pe sbatte’ ‘a capa ‘o muro

e pe se lamentà

si meglio nun ce stà

ch’è meglio ‘e niente.

Gioacchino Ruocco

Ostia Lido        14.02.018