A mille a mille....

A mille a mille

A mille a mille
passiàveno 'e perzone

‘A jurnata era bella

e ‘o core mio,

ch’era nu farenella,

appena te vedette

s’allummaie

guardannete fisso

dint’a ll’uocchie.

‘O mare se muveva appena

na rezza zumpava ‘nterr’a rena

p’’e pisce ch’eva purtata ‘nterra

a centenare.

Chisto era ‘o munno attuorno

chillu juorno

ch’era ‘a dummeneca ‘e Pasca

‘e quanno ero guaglione.

Na matina

ca tutt’’e femmene

ereno culumbrine

cu pezze nove ‘ncuollo

liggere

comme si fosse està.

Doppo nu poco

ce fujenu fuja fuja

pe ll’acqua ca chiuveva

c’’o sole ‘ncielo

‘e na jurnata ‘e marzo.

Chi nun teneva ‘o mbrello

cercaje nu riparo

ma chi ‘o tenevo

‘o dette

a chi le steva a ttiro

e me truvaie affianco a te

cu ll’uocchie nire

c’’a chillu juorno

facetteno ‘mpazzì

a me e a te

senza capì

si era na passione

o nu vero ammore.

‘A dummeneca ‘e Pasca

‘e tantu tiempo fà

ero guaglione ancora.

Tenevo diciottanne

e ‘a tanno

te penzo ancora.

Ne so’ passate ‘e anne

ma tu nun ire ‘e ccà.

Ire ‘e passagge.

Facive ‘a cura ‘e ll’acqua

me diciste

e ire ‘e nu paese

ca ‘un me vuliste dì.

Mò quanno passo a ‘e terme

te cerco ‘miez’a ll’ate.

Ma ce ne fosse una

tale e quale a tè.

Una… ma stongo ancora sulo.

Quarcuno mmurmulea

ca so’ nu malamente

si ‘’miez’a tanta gente

nun ce ne stà maie una

ca me fa scevulì.

Na dummenza ‘e Pasca

nun capite po’ sempre

ca scenne ‘nterra n’angelo

primmo ‘e ferni a ll’inferno.

Gioacchino Ruocco

13.06.018  Ostia Lido