Dedicata a chi la pensa come me! Anima e coraggio!

Facimmancello chistu quatto ‘e maggio!

Troveno ‘o tiempo ‘e  jì vennenno ‘a droga

e songo quatte fesse sempe ‘a galle.

Sfruttano ‘e vizie e chi nun  tene ‘e palle

vennenese ‘o mare e pure arena.

LL’acqua, ll’aria e chellu ppoco ‘e bbene

c’ancora ve crerite  ca so’ vvoste.

‘A brava ggente tene na faccia tosta

ma palle niente ormai, site fernute.

Chiste ve fanno sgarre tutt’’e juorno

e vuie zitte e mute comme ‘e curnute

ca magnene facenne ‘e ricuttare.

Che vita amara  è ‘a vosta, e  a chi è partuto

ca ce ritorna pe via d’’a nustalgia

quanno vedeno  sta ddia ‘e fetenzia

c’ormaie hanno fatto ‘e sta città

ca pare nu tavuto mmie z’’a via

le veno ‘ncuorpo nu penziero amaro:

Ma chiste songo vive o songo muorto?

e’ overo ‘e campusante ormaie so’ dduje

ma ncoppe ‘e fuosse nun ce site vuie.

Lasciate perde ‘e tazze ‘e cammumille

ca ccà ce sta a se sceppà  ‘e capille

e ll’anema ‘e tutte sti fetiente

c’ormaie so centenare  a ‘o sizia sizia.

‘E russe, ‘e verde e janche  ormaie so ’eguale.

So’ chiacchiere. Chello ca sanno fà

‘o fanno sotto a ll’uocchie ‘e tutte quante.

So’ mariuole e basta, nun so sante.

Facimmancello chistu quatto ‘e maggio!

Pigliammo cu ddoje mano chillu curaggio

ca c’é rimasto, ca pure n’ombra basta.

‘O riesto tutte nziemo ce ‘o mmentammo

Basta ca c’’e levammo tutte ‘a  tuorno

c’ormaie me piglio scuorno ca so’ n’ommo.

Pure si sto campanno a n’ata parte

‘a parte mia ‘a voglio ancora fà.

Gioacchino Ruocco

Ostia Lido                  04.05.016