Eternamente…

 

Ma che te penzo a fà

ca si te penzo

chillu penziero

me fa vemì na cosa

ca manco ‘o puorco sente

quanno sta pe murì.

 

Ce vò pacienza !

Ce vò chello ca io nun tengo

‘a cunvenienza

‘e sta cu te

pe nu male ‘e diente

e ȃ rusecà nucelle

pe me sturdì nu poco.

 

‘O broro

è troppo luongo

e nun m’’a sente

e me ‘mbarcà

dint’ȃ stu piatto

ca pare na tenella

tanto è gruosso

ca manco ll’uosso trovo

e manco ‘a carna

ca si è tosta

sicura è sapurita.

 

Che t’aggià dì ?

Si passa stu prurito

ca dint’ capa tengo

io resto e me ne vengo

pure addò vuò tu

c’’o putipù,

c’’o sceta vaiasse

ca passo passo

me  voglio scurdà ‘e guaie

ca nun me danno pace

pure si sta sepe

ca me trovo nnanze

me sta facenno passà

tutt’’e male ‘e panza

ca me stanno a struiere

comme a na cannela

ca resiste

c’ȃ quanno t’aggio vista

vulesse sta cu te

ogne mumento

dicimmo, senza penzà male,

eternamente.

 

Gioacchino Ruocco

 

Ostia Lido           18.12.2020       19,40