Pe nu fritto ‘e pesce
nun me rencresce
‘a cammenata
ca me sto facenno….
Sarrà, c’’a tantu tiempo
nun ne sentev’‘a voglia
‘e piglià ‘o treno
o ‘a machina rimasta a tanto
sempe c’’o freno tirato a mano,
sarrà stu tiempo amaro
fatto ‘e malatia ca me tene,
ma ‘e chell’aria doce
sento ‘a nustalgia ‘e riturnà,
‘e nu bicchiere ‘e acqua na sete
ca nun fernesce maie.
Passanno chistu guaio si moro
voglio murì cuntento
‘nmiezo a chella ggente
ca parla comme a me,
ca si so’ malamente
songo peggie ‘e me
ca indifferente ‘a morte
torno addo so nnato
c’almeno quanno more
fernesco pur’io atterrato
vicino a mamma e a pateme,
‘e nonne, ‘a ziema,
tutt’a famiglia mia
e chille ca venarranno appriesso
quanno è cchiù tarde ponno,
ca pe muri felice
voglio senti l’onne ‘e chistu mare
ca ‘ncore me porto appriesso
‘a quann’ero piccerillo
e me sentevo comme a nu suricillo
quanno me nfunnevo.
Voglio patì chello ca patevo
ca ‘e vvote torna a ‘mpennermme
quanno tornano chilli penziere amare
ca io tenevo aiere,
a doppo ‘a guerra,
a doppo ‘a chilli sciopere
ca nun so maie mancate,
a doppo ‘e curtellate,
a doppo… a doppo
chello ca è stato è stato
e ‘o tiempo ce ha cagnate
purtannece luntano….
addò ogge stammo
sentennece ogne tante
sulo pe nu saluto
ca ogne vvote chiagne e chiagne…
Gioacchino Ruocco
Ostia Lido – 01.02.2021
Nessun commento:
Posta un commento