Chest’eremo na vota poco o niente....

 

Chest’eremo na vota

poco o niente

quanno  comme ‘a ggente

rusecavemo

sule cicere e summente

nu piezzo ‘e trippa

e chi manco chesta

puteva assapurà,

jeva cercanno attuorno

sotto ‘e fenesta

e chi ‘a sera jettava ‘nmiez’a via

‘o poco ‘e bbene ‘e Ddio

c’avanzava a lloro

ca comme ggente bbene

nun s’’o mangiava…

pe decoro.

 

Chest’eremo na vota

quase niuscino

gente ca cuntava sulo quanno

‘o ciuccio ‘n avastava,

quanno servevemo pe ll’uso

ca ‘o tiempo abbisugnava

o ‘e n’ata mano

pe se grattà ‘o pertuso

o pe fà ‘e ciucce

ma senza ciucce mmocca

pe ce suca nu poco ‘e liquirizia,

sula na pupatella

si ire criatura

o manco chella…

 

Chistu paese è ‘o nuosto

doppo tante

ma che ce avimmo fatto

ca sulo ‘o santo

si nun fosse pe isso

ca ogne tanto

ancora ce fa ascì

nu poco ‘e sole

quanno è ‘a festa soia

manco chesto

succedesse

cu ‘a ggente ca passa

e ce fà fesse.

 

Gioacchino Ruocco

Ostia Lido22.04.2021