Ce vo nu stommaco...

Senza tetto 

abbandonato da famiglia e istituzioni...

da parecchi mesi....

06/09/2016 da Metropolis

Ce vo nu stommaco

cu nu cuorio tuosto

sbattuto cu martiello

assaie pesante

pe ghjì annante

e suppurtà sti fatte

ca pare

ca nun ‘mportano

a nisciuno.

Ce vo nu stommaco

e na pacienzia enorme

penzanno c’’a ggente

nun le ‘mporta

si nnant’a porta

ce sta uno che soffre.

meglio fa bene

a chi te sta luntano,

ca dimane nun vide,

nun te ne ‘mporta cchiù.

E’ overo ca c’’o vicino

‘e vote se cucina

si haie bisogna

‘e sale e pretusine,

ca ce sta ggente

ca girano arrubbanno,

ma chillo pover’ommo

quanta sfratte

ancora addà subì ?

Ce vo pacienzia

si vuò campà cu ll’ate,

ma quanta n’adda avè

chi te sta affianco

si ogne ghiuorno ‘o stanco

fino a ca s’arrenno ?

Male patenno

nun se campa ‘e ammore,

nu core stanco

molla e se ne more.

Si ancora tene forza,

si ‘a scorza è ancora tosta

se ne va fore

e lascia ‘o paraviso

a chi c’è nato

pe fà ‘e fatte suie

cu chi sta ‘e patte.

Nuie che simme ‘mfane,

gente ‘e niente.

scusate si ce rusecammo

‘e diente!

Gioacchino Ruocco

07.09.016               Ostia Lido