E fosse overo ll’acqua d’’a Madonna…

 

E fosse overo   ll’acqua d’’a Madonna…

 

E fosse overo   ll’acqua d’’a Madonna

chella ca onna ȃ sempe dint’’o puorto

ca quanno io m’’o veve

me sento cchiù cuntento

a mmiez’’a ggente

c’’o vene a s’’o piglià

rignenneno fiasche

e meza votte ȃ vota

ca ce vonno ‘e rrote

pe s’’o purtà ȃ casa.

 

E’ comme a qualche cosa

ca te regna,

ma nun t’appesantisce

ca lisce lisce

passeno è ghjiurnate

c’alliggerisce ogne malumore

ma nun capisce comme

c‘o tuosseco

c’’a vita te sta danno

‘a cuollo se ne va

juorno pe giuorno

chianu chiano

senza te ‘ntussecà.

 

E fosse overo

ch’è acqua d’’a Madonna

ca ce vò bbene

comme a na  mamma vera

comme vulette bbene a ‘o figlio suie

ca se ne jette a murì pe nuie

ncopp’a na croce

‘mmiez’’e sberleffie ‘e ll’ate...

Gioacchino Ruocco

 

Ostia Lido  12.03.2021