Si uno tene ȃ dicere qualcosa… dedicata a tutti quelli che fanno nu pireto e si sentono importanti in attesa di un monumento....

 

Si uno tene  ȃ  dicere qualcosa…

 

Si uno tene  ȃ  dicere qualcosa

c’’a dicesse

si no fa comme ‘o fesso

ca nun vo’ jì ȃ guerra.

 

Si uno cade ‘nterra

po’ s’aiza…

Si uno sbaglia sbaglia

ca pure ‘o ciuccio arraglia

quanno nun tene famma,

m’arraglia ȃ chi canosce.

 

Si tiene ‘e ccosce ca te fanno male

assettate,

ca doppo starraie meglio.

Adduormete, sta sveglio,

fa comme te pare

c’’o mare tene ȃ fa

pe fatte suie.

 

Nuie ca simmo nuie

ce hamma ‘mparà ancora

a farce ‘e fatte nuoste

o quanno ‘o fatto apposta

nun va bbuono

senza pigliarla larga

e ghjì pe Sant'Antuono

ca pierde tiempo e basta.

Ogge nu muorzo ê pasta

abbasta e avanza.

 

A na certa età

è meglio accuietarse

ca ‘o grasso nun fà bbene...

Meglio duie passe

e si t’’a siente tre

si tiene ȃ che vedè

c’ogne lasciato è perzo

ê na manera o n’ata.

 

Mò te saluto,

ca tengo ȃ fa pur’io.

No, ‘e ccose ê Ddio

nun ‘e ddico ancora

c'ancora ll’ora soia

‘un è venuta.

 

Gioacchino Ruocco

Ostia Lido 26.05.2021  h 08.00