Vulesse riturnà a primavera...

Vulesse riturnà a primavera

quanno ‘a terra se sceta e se fa allera

e mette verde pure ‘nfacci’ ‘e mmure

fino addò nu poco ‘e ummete ce stà.

E si ritorno ca tu m’aspiette ancora

te voglio tenè stretta tante astretta

comme si fosse a sera ca partette

pe nun te vedè chiagnere.

Scennette ‘e presso, fuienno

e  ‘nmiez’’a via restaie comme a nu Cristo

comme se po’ sentì chi se ne fuie

chi tene ‘a morta ‘ncuollo e nun ‘o sape.

Facette finta ‘e niente e me ne jette

ma nun truvaie ‘a pace ca speravo

partenno e quanno me screviste

pigliaie fuoco comme si fosse scisto.

E me giravo attuorno e te cercavo

comme si ‘o munno fosse nu paese.

Chi me guardava e nun capeva ‘o juoco

penzavo ch’ero pazzo e suspirava.

Chiagnenno e redenne comme a pazzo

aggio campato senza dì maie niente.

E agge perdute tante ‘e chelle usanze

Scurdanneme d’amice e de pariente.

Vulesse riturnà, ma po’che faccio ?

Te vengo a levà ‘o suonno n’ata vota ?

Te tengo dint’’o core, ‘un te ne caccio

manco si m’acchiappasse ‘o terramoto

ca quanno fuie, fuie e arreto

nun circo manco ll’ombra ca te puorto.

Te siente vivo e invece tu si muorto

‘miez’’o sgarrupo c’ancora te’ncuieto

cu ‘e ricorde che t’è purtato appriesso

‘e chello ca tenive e che rimasto

‘nmiez’’e prete ‘e na casa ca nun sape

ridarte na reliquia pe pietà.

Finita l’08/11/2012           Ostia Lido

Gioacchino Ruocco
La poesia è inserita nella raccolta “Suspire ‘e miezejuorno”
in via di pubblicazione su “Gentedistabia.blogspot.com”