Jammo a Quisisana,

Jammo a Quisisana,

Me vaie dicenno

jammo a Quisisana,

ma ‘a mano toia

nun ‘a trovo maie.

Me giro arreto

pe vedè addò staje

ma nun te trovo

manco a nu palmo ‘a me.

Si curre ‘nnanze

pecchè me chiede ‘a mano

forse te siente perza

si me staje luntana ?

O so io ca penzo ancora

a quanno eremo guagliune

ca ‘a forza ‘e correre

annate o arreto

sembravemo ‘e essere

nu battaglione ’e ggente.

Mò te dicevo: - aspettemo

e doppo te perdevo.

Sembrava na pazzia

ca me vulive fà

pe farte secutà

comme vulive.!

Ca quanno t’acchiappavo

ereno vase

ca comme a chille doce

nun l’evo maie avute.

‘A quanno so’ partuto

nun ce so’ cchiù turnato

Si ammore nun ritorna

io che ce torno a ffà ?

A chiagnere ? a ridere ?

Pe te ca me lasciaste ?

Pe me c’aggio scurdato

tanta suspire e lacreme ?

Partetto e stongo ancora fora

e pe mutive ‘e casa o ‘e famiglia

ritorno ancora ma ne ne torno subbeto

si ‘a nustalia me piglia.

Che le racconta a chi me vede ‘e chiagne

ca nun sto bbuono addò me trovo ogge ?

Guardo ‘o rilorgio e appena ‘o treno parte

cerco,’e  scurdarme tutta chell’arraggia

ca m’afferraje quanno ‘un te vedette

mmiez’a ll’ata ggente che steva a salutà

qualche parente o qualche amico ‘e chille

ca ‘nfunn’’o vico già penzano a ato. 

Gioacchino Ruocco

21.05.018   Ostia Lido