…è ancora primmavera...

Tu nun ce cride,

ma è ancora primmavera,

pure si ‘a sera

fore a sta terrazza

‘o tiempo nun s’affligge

ma se fa curagge

cu sti piante

ormaie sciurute,

tutte appagliarute

quase seccate.

E nun me scorde maie,

maie nu juorno…

Na goccia d’acqua

sta a purtata ‘e mano

e chiove spisso

facenno tempestate

ca supporteno bbone.

Tu nun ce cride

ma io te penzo sempe

pure si stammo luntane

a centenare ‘e miglie

uno a n’ato.

Chi sa pecchè

me songo nnammurato

proprie ‘e te

ca nun staie a reto a casa.

Ogne tempeste ‘e mare

io te penzo

ma tu cu ‘a varca nun aiesce maie.

Si figlia ‘e marenare

ma staie int’’o ciadino a reto a casa

aspettanno

c’ammaturano ‘e cerase

‘e primme sciure arance

‘e mandarine

ll’evere prufumate

a limunella,‘o putrusino,

‘o rosmarino

sempe verde e allero.

Viate a te

ca faie ‘a vita ‘e signurina

cu tante galluzzielle

sempe appriesso

pure si sanno

ca io te penzo sempe.

E’ ancora primmavera

pure si nun ce cride.

Daie c’attuorno a te ‘o friddo

ormaie se ne ghjìuto

già a paricchio

e ‘o sicchio

è hino ‘e frutte scutuliato

d’’a ll’urdema trubbea

che c’è stata.

Gioacchino Ruocco

Ostia Lido     21.06.2020

Inserita nella raccolta

“…è ancora primmavera...”