A Sebastiano Somma...

Per ringraziare SEBASTIANO SOMMA

delle parole che dice in un video che al momento non riesco a trovare.

Amma ‘spettà nu poco..

Quanno passe nu guaio

ce sta ‘o tiempo ‘e primmo

e ce sta‘o tiempo e doppo

ma cu stu fatto ca sta succedenno

‘o tiempo ‘e primmo

se ne ghiuto ormaie

lasciannece

 nu guaio accussi gruosso

ca pure a guerra

ca già aggio campato

pure si è rimasta na pazzia,

è già passata

ormaie a tantu tiempo.

Stammo campanno

necessariamente

comme si dimane

fosse ‘o mumento

ca stevemo aspettanno

nu poco pe ll’anne

e nu poco p’’a salute

c’’a ll’età mia

m’aiuta e nun m’aiuta

a sta tranquillo.

A fforza ‘e m’acchiappà

‘e vvote p’’e capille

ne tengo poco ‘ncapa

ca pare  ormaie na rapa.

Io te canosco ‘a quanno

ire guaglinciello.

Ce simme ritruvato ogne tanto.

Me fa piacere

ca tu nun te ne scuorde

e pienze ancora, comme facc’io ‘e vvote,

‘e ce turnà,

pe guardà ‘nfaccia a ll’ate

ccu chi bbene ‘o male,

ammo campato assieme

‘ncoppo ’o lungomare

o comme vicino ‘e casa,

amice o canuscente

ca so’ sempe ggente

ca ce aiuta a vivere, a campà

a faccia ‘e chille

ca ce vonno male

o ce 'o fanno 'o mmale

pure si nun ce sanno

pecchè so’ malamente.

Amma ‘spettà nu poco..

punto e basta

mentre a mmiezo juorno

aiutammo a calà ‘a pasta pure a ll’ate

speranno c’almeno ogge avasta.

Dimane è n’au juorno

ce penzammo

senza cagnà programma,

senza ce scunfirà.

Gioacchino Ruocco

‘o Figlio da signora Rafilina.