Si 'a cosa putesse esse..

Si ‘a cosa putesse esse

Piaglia na jatta e falle fa ‘o sorice.

Si ‘a cosa putesse esse

cagnasse ‘a vita nosta

ogne mumento

e a te io te farria

nu monumento

ancora ca si via

senza aspettà

quanno fernesce ‘a vita

pecché putisse dicere ‘o pecchè.

Che faie ‘e bbuono

ca io m’allargo tanto

ca n’atu ppoco

parlo ‘e te

comme a na santa

e sulo cu te

tengo na pacienza tanta

ca si ‘un ‘a tenesse

fernarria ‘o munno

ammore nuosto

ch’è tuosto

ogne mumento.

Io dico niro e tu

comme a nu pataterno

‘o faie addeventà

sempe cchiù blù.

Nun piglio ‘o terno

ma songo felice

ca cchiù ‘e nnammurate

simme amice

ca se vonno bbene

e ce diciemmo ‘e ccose

senza ce appiccecà.

Quanto so scemo ‘e vvote

e tu cu me

ca cagne ‘e ccose

senza ‘o ddà a vedè

si si cuntenta o no,

ca io nun m’aizo nu cummò

ma è nu sciuscio ‘e viento

ca ce votte ‘a reto

pe ce lascià cuntento  a sera

quanno ce vene ‘o suonno

e ce  ne fà fà nu suno

ca si ‘o racconto a ll’ate

ce avessero arrubbà

pe passa ‘o tiempo

a core a core

a corre e a pazzià

senza ce appiccecà,

senza fa storie

comme facive primma

ch’eremo ‘a raspa e ‘a limma.

Mò ce capimmo

appena ce guardammo.

Parlammo cu nu sguardo

e nun se fa maie tarde

ca po’ ce hammo lascià.

Dimane è ‘a stessa cosa

quanno, tenennece pe mmano,

ce facimmo tutt’’o lungomare

primma e accummicià n’ata jurnata

senza cchiù ‘o pare e spare

comme fossemo chill’ate

ca ogne sguarde è guerra

quanno cu ‘e piede ‘nterra

nun ce sanno stà

e comme a ‘nnammurate dispettuse

vanno cercanno

‘e scuse a centenare

pe se dà nu vaso

mentre ‘o mare

sbatte e sbatte

ed è cuntento

pure c’’o maletiempo

quanno fa ‘o malamento

e mette ‘ncopp’a rena

‘o munno arrevutato.

Gioacchino Ruocco

Ostia Lido           08.03.2020

Pera la festa degli innamorati