Dedicata a Carlo - ‘O regalo

Torino - Piazza Solferino

Partenno m’è lasciato

na rosa ‘int’’o bicchiero

ca tene nu profumo

a vvote doce

e a vvote malinconico.

‘E spine nun se conteno,

ma chesto nun è niente,

ca dint’a casa se sente

na voce ‘e solitudine

ca va cercanno ll’aria.

Se sfrunnarrà ?

Ce penzarrà ‘o tiempo.

Chillu tiempo

ca già l’ha fatto crescere

e ddà ‘o profumo justo.

Ce vo’ nu poco ‘e tiempo

pe farne essenza,

nu poco ‘e cumpiacenza

p’’a jucata

c’ancora nun è chiusa.

M’è fatto nu regalo

e nun capevo ch’ero

chillo addore

ca sentevo attuorno.

E nun me piglio scuorno

d’’o dicere e d’’o scrivere

pecchè me sento ‘ncullo

nu penziero ca m’accumpagna

comme si stesse ‘nmiez’’a campagna

‘nmiezo a ll’evere addirosa.

Sta rosa è nu penziero

ormaie ca  resta

‘nnanz’a fenesta ‘a quanno l’hai lassata,

ch’’e vvote me piglia e me ne porta

luntano c’’o penziero

addò aiere so’ state

e addo ancora ce stanno

ll’anne c’aggia campato.

Basta c’arape ‘a porta

ca già m’’e sento ‘ncuollo.

Gioacchino            Ruocco

Ostia Lido             26/12/2012      ore 06/00

Inserita nella raccolta “Suspire ‘ e miezejuorno”