Jesce, jesce, sole

I’ sto cercanno ancora na parola

‘e quann’ero guaglione

mentre tutt’’o munnno è cagnate

attuorno a me

e si rimaste ll’unica

ca nun ‘o vo’ capè.

I’ songo ancora chillo

ca te cercava 'e dicere

ca te vuleve bbene,

ma tu nun stive a sentere

tu nun vulive a me.

Destino ‘ntussecuso

pe tutt’’e juorne

ca ne so’ venute

e invece ‘e darte l’urdemo saluto

stongo screvenne ancora

‘o bbene ca te voglio.

Tengo na capa

chiena chiena ‘e mbroglie

e ‘o tiempo,

chi ‘o ssa si avasta,

ca ‘ncopp’a  ll’asteco

mentre sta ascenno ‘o sole

ritorna a chiovere

e attuorno nun c’è

manco ‘a primavera

addò pusasse st’anema sincera

e m’addurmesso

pe na mez’ora ‘e suonno.

Ma quale  primavera

va cercanno stu core mio?

N’auciello freddigliuso

ca s’è annascuso sott’a bagnarola

nun riesce cchiù a cantà.

ca pure a isso manchene ‘e parrole.

Jesce, jesce, sole

pure si nun è tiempo ‘e giuventù,

‘a mia, ca sti guagliune

n’hanno bisogno ancora,
ca nun ce ‘a fanno cchiù.

Gioacchino Ruocco

Ostia Lido   18/12/2012

Inserita nella raccolta “Suspire ‘e miezejuorno”