Campagna elettorale - Appena sistemano ‘a villa

Appena sistemano ‘a villa

sciure e sciurilli,

nu bellu taglio ‘e capille,

na vesticciolla

sicondo ‘a stagione

e po’ te n’adduone

che d’è stu paese.

Sperammo

ca passa ‘a ragione

si no na prucessione

cu santu catiello

ce vo senz’ato

pe levà ‘a miezo

sta jacuvella.

Sta sfugliatella

nun ce vuleva.

Ca se levasseno ‘a miezo

sti svergognate.

pavanno ‘o disturbo

ca ce hanno criato.

Pe lezione.

Speriammo ch’’e nuove

nun so’ ati chiuve.

Na croce ce basta

e ce avanza.

Nuie avimmo bisogno

ch’‘e male ‘e panza

c’’e fanno passà.

Ma dint’a ll’aria

l’addore ca sento ‘n è bbona.

So’ ati fetiente,

munnezza acchiappate

 cu ‘e mmane e cu ‘e dinte

‘a chi penza

ca nun sinmmo cchiù niente,

ca ponno fa chello ca vonno,

ca po ce vedimmo a pesielle.

E ‘a bella stagione

senza guagliiona

m’’a fanno passà.

A ddò vaco

si ‘o mare ‘n ‘o veco ?

A Puzzano?

Ma puozzo sta bbuono

ca tengo nu pere

ca nun me funziona.

‘A nuvena ‘a Madonna

ce faccio st’estate,

anticipata.

Gioacchino Ruocco

Ostia Lido        26.05.016

Inserita nella
“Raccolta differenziata: Campagna elettorale.”