Cesino
'O largo d''a Pace
E quanno trovo pace affianco a te ?
Nun saccio cchiù 'a quant'anne stamme assieme
c'ormaie me so' stancato 'e te sentì.
Sempe c''o stesse fatto
ca comme me vuò bbene
'o bbene mio è nniente affronte 'o tuoie.
Si nun te dongo retta quanno passo
'o spasso tuio 'e me venì appriesso
se ferma sott'a ll'arco
a qualche tiempo.
Te gire verso a chhiesa
e te daie pace
mentr'io cammino e me trovo sulo
commw a na vrase
fino a 'int''o chignulo
pe ddo' scengo a mare
a preparà 'o vuzzo p''a piscata
'e primma sera
quanno ogne ccosa trase
pe s'arrepusà.
Chi sà dimane
si so' cchiù ricco 'e ogge
'nmiez''o rilorge
vennenno quatte vope e sparagliune
e qualche purpo
ca vò ave ragione
cercanno 'e se n'ascì 'a dint''o cato ?
Fronne 'e stucchione
me sento 'mpietto
'o core nu streppone...
quanno do' a voce
ca me resta 'ncanna
e chiagne 'ncuorpo
pe nun fà sapè
a sufferenza
ca io stongo patenno
pe nun me cuccà ancora
'nziem'o a te.
Gioacchino Ruocco
Ostia Lido 01.11.019
Nessun commento:
Posta un commento