Nu filo ‘e fummo

Nu filo ‘e fummo

'ncopp''e  Camarelle,

sarrà na furnacella

o qualche ‘nfame

c’allintrasatta

vò appiccià ‘a Muntagna

p’appripararse

‘o spazio pe na casa

e accummincià

triate e triatielle

pe farse purtà ll’acqua

e ll’ati servezielle

ca cu nu bicchieriello

isso va a piglià

a ‘e case ‘e sotto ?

Guardanno sta muntagna

chi ce guadagna è ‘o core

chino ‘e nustalgia.

‘A mia nce faccio provole

c’appenno e asciutta ll’aria

c’attuorno nun ce pare

me mette ‘a freve ‘ncuollo

e nun turnà cchi abbascio.

‘E ccosce ancora bone

me porteno addò voglio

e quanno scengo abbascio

me fermo ‘ncopp’e scoglie d’’a banchina

pe cozzeche e patelle

e dint’a rena doje telline.

Proprio stammatina

‘a voglia m’è turnata

‘e farme duje spaghette a surrentina.

Nu scorfano , na seccia

e duje cazzille ‘e re

pe d’’a culore ‘o fritto.

Nu purpo ‘e scoglio

e me ne saglio ‘ncoppo

pe riguardà ‘o paisaggio

mentre ‘o murziello

me regna chianu chiano

‘o stommaco

cu l’ addore ‘e parmiggiana

ca pe stasera è pronta.

Gioacchino Ruocco

04.05.017

Dedicata ad Enrico Discolo