Che pò raccuntà na via ch'è corta,
ca primma era campagna
e passavo 'o tiempo sulagna
sotto 'o sole o a vierno 'o friddo
ca int''o terreno s'attaccava 'e piante
già 'e primma matina cu l'acquazza ?
Gente ca cagnanno quartiere
cagna d''a matina 'a sera
na vita sana. Ognuno è furatiero
c''o vicino, c'appena appena sciato,
ca cerca 'e nun guastà c''o vicinato,
fino a ca nun è tiempo.
Bongiorno e bonasera
cercanno 'e ne fà ammeno fino a quanno
nun cagna 'o tiempo e nun se stenno
qualche panno 'ncopp'a ll'asteco.
'O mare sta luntano, 'a ferrovia
se sente 'o treno ca ogne tanta passa.
Pe fà duie passe 'a via è troppa astrette
e nun ce sta manco na panchina.
Nu surzo d'acqua o na mmericina
si nun t''e puorte e te va qualcosa storta
Ce vò sultanto l'assistenza 'e Ddio
si nun st'appriesso a qualche sfurtunato.
A capa 'e via a via vecchia ca porta
fino a Torre passato 'o Sagliescinno.
A quanno 'a vita scorre 'e n'atu modo
nun è 'o deserto ca ce steva primma
cu 'a terra chiena 'e chiantimme
E nu silenzio ca me sembrava stuorto
pe qualche muorto ca capitava 'e vvote
pe tanta fatte ca ero guaglione
e nun capevo chello ca succedeva
sentenno 'o friddo 'ncuollo c'arrivava
comme a na scuppetata 'a miez''o mare
c''a gente raccuntava cose strane.
'E poche vote ca ce aggio passato
l'anema ' Ddio sembrava assente o morta.
Sulo dint''a storta asceva
qualche attemo 'e perzona,
qualc'ombra ca purtava 'o figlio a scola
c'astretta astretta le teneva 'a mano.
Gioacchino Ruocco
Ostia Lido - 05.08.017
Inserita nella raccolta : Dimane...
Nessun commento:
Posta un commento