Sulo comme a nu cane
me giro attuorno,
cerco nu tuozzo ‘e pane,
ma chi me passa a ffianco
o è stanco
o penza ‘e fatte suie.
So’ comme a nuie
ch’’e vvote ce sbranammo
penzanno ognuno ‘e fatte proprie.
Ero nu cacciuttiello
e ‘ognuno me vuleva
ma a me nun me piaceva chistu fatto.
Guardavo ‘e guagliuncielle
e me ‘mmiscavo ‘e vvote
‘mmiez’a lloro.
Ereno oro ‘e resate
ca se facevano pazzianno
Era ‘o tiempo cchiù bello.
Jucaveno ‘e furmelle,
c’’o strummelo
“a ciaccia, a mazza e pìvezo
e me scurdavo ’o ssolito,
ca me murevo ’e famma”*
Mo tengo quinnicianne
ca pe nu cane ormaie
songo tante.
Sto sempe ‘mmiez’a vie
‘e Pasca, a Capuranno
e ogne festa
addò nun ce so botte
sarraggio pure cane
ma io m’’a faccio sotto.
Nun tengo nu patrone
songo crisciuto libbero
col libbero pensiero
e nun mette a cariche
forse ‘e nu brigadiere,
forse ‘e nu mariuolo
o ‘e chi rimane sulo
senza cumpagnia.
Ve dico ‘a verità
meglio sta sulo
mmiez’a na via
ca dint’a fetenzia
qualcosa trovo.
Chiuso ‘int’a na casa
e sta raso pe terra
accucciato tutt’’a jurnata
che ce facevo
curiuso comme songo?
N’anema ‘e Ddio
ogne tanto ‘a trovo
e n’uosso a rusecà
fore a na chianca.
Quanno so’ stanco
‘e chello ca facite
m’accuccio comme ‘o solito
a ‘o posto ca io tengo
pe me fà passà 'o prurito
e ‘un voglio dì a nisciuno
ch’’e vvote
‘o trovo chino ‘e maccarune.
‘A verità ne tengo cchiù ‘e uno.
Addò me trovo bbuono
mecco tenna,
m’addò me trovo male
nun m’arrenno,
ce passo ‘e vvote
me stengo duie minute
e me ne vaco.
Si trovo nu guaglione
ca me corre appriesso
è na jurnata bella.
Ce pazzeo fino a ca se stanca
fino a c’’a cianca
nun torne a me fa male.
Mentre pazziavo
cu nu foglio ‘e giurnale
na macchina
ca nun m’aveva visto
facetto ‘o guaio
e comme ‘a tuue ‘e cammurrista
jastemmaie: - Puozze murì…
giraie e se ne jette
e io patette
nun v''e ddico quanto
fino a cca San Catiello
'nn 'o sapette....
Gioacchino Ruocco
19.12.019 Ostia Lido
*Raffaele Viviani: Guaglione - 1931
Nessun commento:
Posta un commento